Esparrua

Herritarren espektatiba eta behar legitimoak sistematikoki antzematen dira eta zerbitzu publikoen plangintzan eta jardunean txertatzen dira, prozesu gardenen bidez.

Deskribapena

Udal-gobernuak gobernu-ekintzaren erdigunean jartzen du herritarren partaidetza, eta hori modu ezberdinetan artikulatzen da. Batetik, Donostiako Udalak badu Herritarren Partaidetza Eredu propioa, Udal-politiketan herritarren parte-hartzea sustatu, antolatu eta bermatzeko oinarri den dokumentu bizia. Bestalde, Donostiak badu Herritarren Partaidetzarako Arau Organiko bat, non herritarren parte-hartzea sustatzeko eta garatzeko, gardentasuna indartzeko eta tokiko demokraziaren kalitatea hobetzeko esparru egonkor bat ezartzen den. Arauak hainbat eskubide eta partaidetza-bide aitortzen ditu, eta tresnak artikulatzen ditu, hala nola aurrekontu parte-hartzaileak, auzoetako prozesu komunitarioak, eztabaida-tailerrak eta sektore- eta lurralde-kontseiluak. Horrela, parte-hartzea udal-kudeaketan eta politika publikoak egiteko faseetan zeharka txertatzen da. Esparru hori Herri Kontsulten Araudiarekin osatzen da, zeinak berariaz garatzen dituen kontsultak sustatzeko prozedurak, bai erakundeen ekimenez eta baita herritarren ekimenez. Erregelamenduak horiek egiteko beharrezkoak diren baldintzak, bermeak eta antolaketa-sistema zehazten ditu, eta gardentasuna, argitasuna, berdintasuna, inklusioa, neutraltasun instituzionala eta kontuak ematea bezalako printzipioak txertatzen ditu. Oro har, bi arau horiek segurtasun juridikoa ematen dute, eta garrantzi berezia duten udal-gaietan esku hartzeko mekanismo argiak eta arautuak eskaintzen dizkiete herritarrei.

Informazio osagarria

https://www.donostia.eus/eu/home